Առցանց անվտանգ գնումներ կատարելու լավագույն փորձը

Գլոբբինգ և ONEX ծառայությունների հետ մեկտեղ հեշտանում է առցանց գնումների ամբողջ գործընտացը, և ավելի հաճախակի ենք գնումներ կատարում առցանց: Սակայն OnePlus ընկերության պաշտոնական օնլայն խանութի տվյալների կողոպուտի հետ կապված վերջին դեպքերը ստիպում են ավելի կարևորել անվտանգության սկզբունքը՝ առցանց գնումներ կատարելիս:

ԿԱՐԴԱՑԵՔ ՆԱԵՎ` Տվյալների արտահոսքից տուժել են OnePlus-ի 40,000 հաճախորդ

Ի՞նչ է պետք իմանալ բանկային քարտի գաղտնիությունն ապահովելիս

• Խուսափեք բանկային քարտը որևէ մեկին փոխանցելուց, քանի որ օնլայն գնումներ կատարելիս քարտի վրա պատկերված CVV (Card Verification Value) համարի միջոցով ձեր անձը նույնականացվում է անյպես, ինչպես քարտի PIN-ը (Personal Identification Number)՝ բանկոմատից գումար հանելիս: Այլ բառերով ասած, ձեր PIN կոդը դուք ոչ ոգի ցույց չեք տա, այնպես չէ՞:

Ի՞նչ է պետք իմանալ բանկային քարտ ընտրելիս

• Խուսափեք հիմնական բանկային քարտով առցանց գնումներ կատարելուց: Առցանց գնումների համար խորհուրդ է տրվում ունենալ երկրորդական բանկային քարտեր, որոնց վրա գումար եք ավելացնում միայն այն ժամանակ, երբ ինչ-որ բան պետք է գնեք որևէ օնլայն խանութից:

Ի՞նչ է պետք իմանալ օնլայն խանութ ընտրելիս

• Խուսափեք անծանոթ խանութներից գնումներ կատարելուց: Քիչ է հավանականությունը, որ որևէ անծանոթ խանութից գնումներ կատարելիս կկարողանաք գնված ապրանքը հետ վերադարձնել կամ, ինչն ավելի կարևոր է, գոնե թե ստանալ գնված ապրանքը:
• Օնլայն խանութից որևէ ապրանք գնելուց առաջ ուշադրություն դարձրեք կոնտակտային տվյալներին, քանի որ խնդիրների դեպքում այդ տվյալներով եք փորձելու կապ հաստատել խանութի պատասխանատուների հետ:
• eBay, AliExpress կամ նմանատիպ կայքերում որևէ խանութից (օգտատեր) գնումներ կատարելուց առաջ նախ ուշադրություն դարձրեք մյուս հաճախորդների կողմից տվյալ խատութի վերաբերյալ թողնված դրական և բացասական կարծիքներին:

ԿԱՐԴԱՑԵՔ ՆԱԵՎ` Անվճար WiFi կապի թաքնված վտանգները

Ի՞նչ է պետք իմանալ օնլայն խանութում գրանցվելիս

• Ընտրեք այնպիսի գաղտնաբառ, որը բարդ կլինի գուշակել: Կարևոր է հիշել նաև, որ ձեր ընտրած գաղտնաբառը պետք է տարբերվի այլ սոցիալական ցանցերում կամ կայքերում ձեր ունեցած գաղտնաբառերից:
• Համողվեք, որ գաղտնաբառի ճիշտ ընտրության կանոնը նաև կիրառել եք այն էլ.փոստի համար, որը նշում եք գրանցվելիս, քանի որ էլ.փոստին ազատ հասանելիություն ունեցող ցանկացած անձ հնարավորթյուն կունենա ձեր անունից նոր գաղտնաբառ ընտրել նաև տվյալ օնլայն խանութի հաշվի համար:
• Հաշիվը կարգավորեք այնպես, որ մուտք գործելու ժամանակ ձեր ինքնությունը նույնականացվի միայն երկրորդ գործոնի առկայության դեպքում:

Ի՞նչ է պետք իմանալ առցանց վճարում կատարելիս

• Առցանց վճարումներ կատարելուց առաջ ուշադրություն դարձրեք «անվտանգ կապի» առկայությանը: Անվտանգ կապի դեպքում ակնկալվում է, որ ձեր և կայքի միջև փոխանցվող բոլոր թվային տվյալները կքողարկվեն (encryption):
• Խուսափեք հանրային օգտագործման համար նախատեսված բաց WiFi կապից: Նմանատիպ կապից օգտվելիս խորհուրդ է տրվում նաև օգտվել տվյալները քողարկող VPN ծառայությունից:
• Խուսափեք բանկային քարտի տվյալները կայքում մշտական պահպանելուց: Այս քայլը կօգնի ձեզ զերծ մնալ անձնական գաղտնի տվյալների արտահոսքից, երբ որևէ հաջողված հարձակման արդյունքում հաքերներին հաջողվի հափշտակել տվյալ օնլայն խանութի տվյալների բազան:
• Անմիջապես ջնջեք ձեր բոլոր տվյալները այն օնլայն խանութից, որտեղ կնկատեք պահպանվել է ձեր բանկային քարտի CVV կոդը:

Ամփոփում

Նշված անվտանգության կանոնները ստեղծված են ձեր գնումները ապահով դարձնելու, և ոչ թե բարդեցնելու համար: Այնպես որ, հետևեք տեղեկատվական անվտանգության մասնագետների խորհուրդներին և մշտապես գնումներ կատարեք անվտանգ և ապահով: