«Մեկ զանգ» կոչվող խարդախություն և թե ինչպես պաշտպանվել դրանից

Հայաստանը այն կենտ երկրներից է, որտեղ դեռ կարելի է հանդիպել կարճ զանգ թողելու (այսպես կոչված «ծնգացնելու») սովորությանը:

ԿԱՐԴԱՑԵՔ ՆԱԵՎ` Անվճար WiFi կապի թաքնված վտանգները

Միգուցե Ձեզ ծանոթ մարդկանց և մտերիմներից ստացված կարճ զանգերին հետադարձ զանգ կատարելը անհրաժեշտություն է շատ դեպքերում, սակայն խորհուրդ է տրվում զերծ մնալ անհայտ կամ անծանոթ հեռախոսահամարներին պատասխանելուց՝ բջջային խարդախությունից պաշտպանվելու համար:

Բջջային խարդախության տեսակները բազմազան են և նպատակ ունեն դրդելու բաժանորդին այնպիսի քայլերի, որոնց հետևանքով հնարավոր է դառնում գումար գանձել բաժանորդի հաշվեկշռից, ստանալ անձնական տվյալներ կամ անգամ մուտք գործել բանկային հաշիվ, եթե բաժանորդը հաճախ է օգտվում բանկային ծառայություններից՝ բջջային սարքի միջոցով:

Բջջային խարդախության տարբեր փորձեր Հայաստանում պարբերաբար են նկատվում: Հատկապես վերջին օրերի ընթացքում, երբ Բոսնիա և Հերցոգովինա քաղաքից բազմաթիվ տարօրինակ զանգեր են ուղվել Հայաստանում բջջային կապի բազմաթիվ բաժանորդների՝ ակնկալելով գումար գանձել հետադարձ զանգ կատարած միամիտ բաժանորդների հաշվեկշիռներից:

Բարեբախտաբար շատ բաժանորդներ չեն հասցրել պատասխանել «անծանոթ» զանգերին և զանգվածային իրազեկման արդյունքում հնարավոր դարձավ խուսափել խոշոր դրամական կորուստներից:

Տարօրինակ զանգերի վերաբերյալ Հայաստանի բջջային կապի օպերատորները նույնպես զգուշացնում են չպատասխանել և առավել ևս հետադարձ զանգ չկատարել տվյալ համարին՝ միջազգային զանգի տարիֆիկացումից խուսափելու համար:

Հարգելի բաժանորդներ,

Մեր ընկերությունը տեղյակ է, որ մի շարք բաժանորդներ ստացել են զանգեր +38765744399 հեռախոսահամարից: Մեր կողմից կատարվել է ուսումնասիրություն և ձեռնարկվել են անհրաժեշտ միջոցներ: Խնդրում ենք հետադարձ զանգ չկատարել տվյալ համարին՝ միջազգային զանգի տարիֆիկացումից խուսափելու համար:

Մեկ անգամ ևս հորդորում ենք լինել ուշադիր անծանոթ միջազգային համարներին հետադարձ զանգ կատերելիս:

— նշված է ԱրմենՏել ընկերության հայտարարությունում

Որպես կանոն, նման խարդախությունները իրագործվում են հետևյալ մեթոդներով՝

• Բջջային ցանցի բաժանորդների հեռախոսները վարակել որևէ վնասակար ծրագրի միջոցով, ինչն էլ բաժանորդի անունից կկատարի ելքային զանգեր՝ վնասակար ծրագրում նշված միջազգային հեռախոսահամարներին:
• Հաջորդաբար կամ միաժամանակ զանգ ուղղել բոլոր բջջային օպերատորների բոլոր բաժանորդների հեռախոսահամարներին՝ հաշվի առնելով հեռախոսահամարների հաջորդական լինելու սկզբունքը:
• Հաջորդաբար կամ միաժամանակ կարճ հաղորդագրություն ուղարկել բոլոր բջջային օպորատորների բոլոր բաժանորդների հեռախոսահամարներին՝ նշելով, թե առկա է բաց թողնված զանգ նշված հեռախոսահամարից:

Ընդհանուր խորհուրդներ բջջային կապի բաժանորդներին

• Պաշտպանե´ք ձեզ խաբեությունից, զգո´ն եղեք, իմացե´ք ավելին գոյություն ունեցող խարդախության սխեմաների մասին: Ուշադրություն դարձրե´ք բջջային կապի օպերատորների, իրավապահ մարմինների, զանգվածային լրատվամիջոցների կողմից խարդախության սխեմաների մասին նախազգուշացումներին, որոնք կիրառում են խարդախները` օգտագործելով բջջային կապի ծառայությունները:

• Համոզվե´ք, որ հեռախոսի միջոցով ստացված տեղեկատվությունն անհայտ անձանցից (ովքեր ներկայացել են որպես իրավապահ մարմինների, ռադիոյի, բջջային կապի օպերատորի աշխատակից, պետական պաշտոնյա, բարեկամ, ծանոթ կամ այլ անձ) ճիշտ է:

• Մի´ շտապեք գործել անծանոթ մարդկանց հրահանգներով, որոնք ստացվել են հեռախոսազանգի կամ կարճ հաղորդագրության միջոցով, հատկապես եթե նրանց հրահանգները պահանջում են Ձեր կողմից որևէ եղանակով դրամական միջոցների փոխանցում: Ձեր շտապողական քայլերը կարող են հանգեցնել դրամական կորստի:

• Մի շտապե´ք անծանոթ մարդուն տրամադրել Ձեր հեռախոսը “Միայն մեկ զանգ” կատարելու նպատակով: Հիշե´ք, որ վերջին ժամանակներս հաճախակի են դարձել այս կերպ իրականացվող հեռախոսների գողության դեպքերը:

Հղումներ

• https://www.facebook.com/beeline.am/photos/a.234673189893875.72439.167044896656705/1717796281581551
• http://about.beeline.am/am/society/index.wbp?id=97496e47-9093-475e-988e-3506107bfa39
• https://www.mts.am/more/Information-Security/Mobile-Security